លោក អ៊ឹម វុត្ថា អ្នកនាំពាក្យនិយតករទូរគមនាគមន៍កម្ពុជាបានថ្លែងថានិយតករទូរគមនាគមន៍កំពុងរៀបចំចេញលិខិតជាផ្លូវការក្នុងឆាប់ៗ ឬថ្ងៃនេះដោយមិនឲ្យហួសក្នុងខែមីនានេះទេក្នុងការបញ្ចប់សំឡេងរោទ៍ពីគ្រឹះស្ថានមីក្រូហិរញ្ញវត្ថុទាំងអស់នៅកម្ពុជាជារបស់ឯកជនមិនមែនជារបស់រដ្ឋនោះទេព្រោះរដ្ឋាភិបាលយល់ថាពលរដ្ឋបានជ្រួតជ្រាបពីការផ្សព្វផ្សាយមួយនេះហើយ។
លោកបានថ្លែងថា៖ «យើងកំពុងរៀបចំចេញលិខិតជាផ្លូវការមិនឲ្យហួសក្នុងខែមីនានេះទេសំឡេងរោទ៍នេះនឹងត្រូវបានបញ្ចប់ក្រោយពីរដ្ឋាភិបាលមើលឃើញថាសារនេះបានជ្រួតជ្រាបដល់ពលរដ្ឋហើយ»។
លោកបានបញ្ជាក់បន្ថែមថាជាការពិតនិយតករមិនបានទទួលការត្អូញត្អែរជាផ្លូវការណាពីប្រជាពលរដ្ឋនោះទេ។
លោកថា៖ «យុទ្ធនាការរបស់រដ្ឋាភិបាលគឺមួយឆ្នាំតែបើពលរដ្ឋយល់ជ្រាបអស់ហើយរដ្ឋាភិបាលនឹងផ្តាច់ដូចការបង្រៀនអ៊ីចឹងបានសិស្សយល់អស់ហើយការបង្រៀននឹងបញ្ចប់មុនពេលកំណត់មិនមានអ្វីជាបញ្ហានោះទេ»។
នៅក្នុងឱកាសបើកសន្និបាតបូកសរុបសមិទ្ធផលវិស័យព័ត៌មាន និងសោតទស្សន៍ឆ្នាំ ២០១៦ និងលើកទិសដៅឆ្នាំ ២០១៧ កាលពីថ្ងៃទី ២ ខែមីនាកន្លងទៅលោក ខៀវ កាញារីទ្ធ រដ្ឋមន្រ្តីក្រសួងព័ត៌មានបានបញ្ជាក់ថាមានក្រុមអ្នកស្វែងរកប្រយោជន៍ផ្ទាល់ខ្លួន និងអ្នកនយោបាយខ្លះបានឆ្លៀតកេងចំណេញនយោបាយដោយបានលើកឡើងពីបញ្ហាលុបបំបាត់បំណុលដើម្បីដាក់បន្ទុកមកលើរាជរដ្ឋាភិបាលដោយសន្យាខ្យល់ក្រោមហេតុផលថាបើបោះឆ្នោតឲ្យខ្លួនធានាលុបបំណុលទាំងអស់ដែលពលរដ្ឋជំពាក់ទើបរដ្ឋាភិបាលចេញយុទ្ធនាការផ្សព្វផ្សាយធ្វើយ៉ាងណាកុំឲ្យពលរដ្ឋមានការយល់ច្រឡំ។
លោកបញ្ជាក់ទៀតថាចំពោះសំឡេងរោទ៍ចូលតាមទូរស័ព្ទដៃដែលបញ្ជាក់ពីស្ថាប័នមីក្រូហិរញ្ញវត្ថុមិនមែនជារបស់រដ្ឋនោះ មិនអាចរត់រហូតមួយឆ្នាំបានទេវានាំឲ្យសាំ ឬក៏ធុញទ្រាន់ហើយលោកនឹងពិគ្រោះសុំយោបល់ពីសម្តេចនាយករដ្ឋមន្រ្តីក្នុងបញ្ហានេះ។
ក្រោយការចេញសារនេះមានអ្នកប្រើប្រាស់បណ្តាញសង្គម Facebook ខ្លះបានសរសេរថាពួកគេធុញទ្រាន់នឹងសំឡេងរោទិ៍មួយនេះព្រោះទូរស័ព្ទជារបស់ឯកជនពួកគេមានសិទ្ធិប្រើប្រាស់ និងជ្រើសរើស Call Tune ខ្លួនឯងហើយអ្នកខ្លះទៀតបានសរសេរឌឺដងថាឲ្យតែលើកទូរស័ព្ទតេពេលណាក្តៅចិត្តពេលហ្នឹងតែម្ដង។ ចង់ប្រាប់ថាទូរស័ព្ទខ្ញុំជារបស់ឯកជន មិនមែនជារបស់រដ្ឋទេកាលណាបានបិទ? ចំណែកខ្លះទៀតបានសរសេរថាមិត្តប្រុសជារបស់ឯកជនមិនមែនជារបស់រដ្ឋទេជាដើម...។
លោក អេង ឆៃអ៊ាង អនុប្រធានគណបក្សសង្គ្រោះជាតិបានឲ្យដឹងថាយុទ្ធនាការ Call Tune គួរតែបញ្ចប់ហើយព្រោះពលរដ្ឋធុញទ្រាន់ណាស់ទៅហើយពេលនេះ។
លោកថារដ្ឋាភិបាលគួររិះរកវិធីណាដើម្បីបង្កើតការងារឲ្យពួកគាត់វិញនៅពេលដែលពួកគាត់ប្រឈមនឹងភាពខ្វះខាត និងគ្មានការងារហើយទៅខ្ចីបុលគេជាជាងធ្វើយុទ្ធនាការផ្សព្វផ្សាយពីសារនេះ។
លោកថា៖«តាមពិតវាជាទម្លាប់ពួកគាត់ខ្ចីលុយអង្គការពីសម័យមុន។ បច្ចុប្បន្នពលរដ្ឋមានការយល់ដឹងច្រើន...ពេលខ្លះគាត់ធុញនឹងសារនេះណាស់»៕
No comments:
Post a Comment