លោក កឹម សុខា ទៅជួបលោក នី ចរិយា ដល់កន្លែងឃុំឃាំង

មេដឹកនាំគណបក្សប្រឆាំងដែលទើបទទួលបានការលើកលែងទោស បានទៅជួបផ្ទាល់ជាមួយលោក នី ចរិយា អគ្គលេខារង គ.ជ.ប ដែលកំពុងជាប់ឃុំឃាំង ទាក់ទងសំណុំរឿងដែលគេចោទថា លោក កឹម សុខា មានស្នេហាលួចលាក់។
នៅលើហ្វេសប៊ុក លោក កឹម សុខា បានសរសេរថា៖ «រសៀលថ្ងៃនេះ ថ្នាក់ដឹកនាំគណបក្សសង្គ្រោះជាតិ និងខ្ញុំ បានទៅជួបសួរសុខទុក្ខ លោក នី ចរិយា ជាអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត(គ.ជ.ប) នៅពន្ធនាគាររាជធានីភ្នំពេញ(PJ)»។
កាលពីម្សិលមិញ លោក កឹម សុខា ប្រធានស្តីទីគណបក្សសង្រ្គោះជាតិ ក៏បានទៅជួបសួរសុខទុក្ខមន្រ្តីសិទ្ធិមនុស្សសមាគមអាដហុកចំនួន៤រូបដែលកំពុងជាប់ឃុំនៅពន្ធនាគារព្រៃស ក្នុងសំណុំរឿងដែលគេចោទថា ពាក់ព័ន្ធនឹងរូបលោកនោះដែរ។
តាមគម្រោងមន្រ្តីសិទ្ធិមនុស្ស៤រូប និងមន្រ្តី គ.ជ.ប លោក នី ចរិយា នឹងត្រូវបានដោះលែងនៅដំណាច់ឆ្នាំនេះ បន្ទាប់ពីមានការចរចាគ្នាដោយសម្ងាត់រវាង លោក ហ៊ុន សែន លោក ស ខេង និងលោក កឹម សុខា កាលពីសប្តាហ៍មុន៕
Source: VOD